بنفس الروح والمشاعر اللي ادارت بيها الدولة مشاكل كبيرة قومية مهمة زي تيران وصنافير وسد النهضة بتدير حاليا مشكلة الثانوية العامة الجديدة ، مجرد قرار بيطلع في الضلمة ويتفرض على الشعب بغض النظر مين رأيه إيه ..

واذا الناس هاجت وغضبت بيستخدموا معاها نفس المنهج ، تهديدات وتخويف ثم تطنيش وتسقيع ودان ومواصلة التنفيذ باعتبار ان الناس مش فاهمة مصلحتها كويس ..

وكالعادة نتقسم معسكرين الأول يدافع باستماتة عن أي حاجة تخص الدولة مهما كانت تبعاتها والتاني يهاتي لغاية مايزهق ، وربما يضطر للدفع بضحايا تتعمل لهم قضايا لتخويف باقي المعسكر.

قضية الثانوية العامة التراكمية تشبه تيران وصنافير كده ، في وضوح ابعادها والمصايب اللي هتترتب على القرار الرسمي ، وتعنت المسئولين واصرارهم على استكمال مهمتهم ، واتهام المعارضة بالهرتلة ، ومحدش في المسئولين دول بيفهم الناس الحقيقة ...لافيه مسئول طلع اتكلم بجد وقال ليه سلمنا ارض مصرية طوعا وبكل حب لدولة تانية وبكام ...ولا حد قال الاسباب اللي خلت وزير التربية مستعجل على تطبيق مشروعه رغم فداحة نتايجة على المدى القريب والبعيد..

مانتكلم صراحة ونقول ان تيران وصنافير جزء من موضوع كبير مش هتفهموه ولا تهضموه دلوقت ؟

او ان مشروع التطوير عينه على الغاء التنسيق ومبدأ المساواة ..وانه هيسيب الطلبة واهاليهم يواجهوا مصيرهم ومايبقاش قدامهم الا الجامعات الخاصة ، وبالتالي اللي معاه هيتعلم واللي مامعاهوش يدور من دلوقت على شغلانة تليق بيه وبأهله..

هامش : الدكتورة جيهان يسري ..عميدة كلية الاعلام استعجلت وطلعت المستخبي في النفوس ضد الفقرا ..وقالت صراحة : أؤيد عدم قبول طلبة من الاقاليم في كلية اعلام القاهرة ..

يعني الطالب المتفوق ينسى حلمه انه يدخل اعلام ويدور له على كلية تاني اذا لحق فرصة ونجح في كشف الهيئة والقدرات اللي هيعملوه ..اعلام القاهرة مش لأي حد

مش هنقول كل حاجة !!

في فبراير اللي فات وقبل ما يفاجئ الوزير مئات الالوف من اولياء الامور والطلبة بحكاية التطوير والثانوية التراكمية أم تابلت طلع الدكتور طارق شوقي على الناس بتصريحات قصد منها يطمن الناس على موضوع ملف الثانوية العامة الجديدة ، وقال إن "الوزارة لديها شركاء كثيرين في ملف الثانوية العامة الجديدة مثل: وزارة الاتصالات، الانتاج الحربي، ومؤسسات أخرى بالدولة" وقال انه لما الناس دي توصل لقرار موحد ( خد لبالك )آآ آ هيعلنوا عن تفاصيل النظام.

وقال كمان ان النظام الجديد هيتطبق بالاضافة للنظام التعليمي الجديد اللي بيبدأ من اولى ابتدائي، والمدارس اليابانية في سبتمبر2018، وانه هيعمل مؤتمر صحفي لكل نظام بشكل منفصل ، وختم بنفس الديباجة بتاعة رجل الدولة التقليدي : مش كل حاجة بتسمعوها صح وكل الكلام اللي بيتقال مجرد تخيلات بعيدة عن الحقيقة.

ولما سألوه ليه الوزارة ما اعلنتش لغاية دلوقتي عن النظم الجديدة دي قال " "لو كل ما خلصنا جزء أعلناه كده هنثير الجدل بين الناس اللي مش هتعرف تكمل الصورة"، وان فيه سبب تانيآآ آ يخص تأمين الأفكار "مش هنقول كل حاجة".

أولياء الامور لخصوا موقفهم في مجموعة نقط واضحة :

"هدفنا تطوير التعليم من الاساس من مرحلة رياض الأطفال ..

ونرفض تغيير نظام وشكل الثانوية العامة الحالي، ونرفض جعل الثانوية تراكمية لمده ٣ سنوات..

آآآ ونرفض الغاء الكتاب المدرسي وتطبيق التابلت وبنك المعرفة كمصدر أساسي ووحيد للتعليم والدراسة .

ونرفض الغاء مكتب التنسيق وتطبيق اختبارات قبول.

ليه؟

لمنع التلاعب وتحقيق العدل والمساواة بين الطلاب.

ونرفض استغلال الغاء مكتب التنسيق وتطبيق اختبارات قبول لتمييز طالب علي طالب بالواسطة والمحسوبية والرشوة.

نطالب بتطوير التعليم واستخدام أحدث الأساليب التعليمية من بداية السلم التعليمي وليس تغيير في مرحلة نهائية مصيرية من عمر الطالب التعليمي.

النظام المقترح ممتلئ بالعيوب ويفتقر للمزايا ويسبب الضرر البالغ للتعليم ..وما قدمه الوزير بعيد كل البعد عن تطوير التعليم فليس من المنطقي او المعقول التطوير من قمة الهرم بل من الاساس .

أولياء الأمور كانوا مرحبين بالنظام التعليمى الجديد اللى هيتطبق من مرحلة رياض الأطفال، لأن التطوير الطبيعي يبدأ من أول السلم، وبعد إعلان تفاصيل النظام الجديد تحول رأى أغلبهم من القبول للرفض..

كمان الوزارة اعلنت عن تعريب المدارس الرسمية للغات فى 2019آآ آ واللي هتبقى زي المدارس الحكومية لغاية 6 ابتدائيآآ آ ، ومن اولى اعدادي تتدرس الرياضة والعلوم بالانجليزي.

وبديهي ان تعريب المدارس الرسمية للغات هيضعف مستوى الطلاب في اللغة الانجليزية،ومفيش بديل ممكن يعوض الطالب عن المصيبة دي.

كمان الوزير استبعد المدارس الدولية من النظام الجديد وده ببساطة تمييز عيني عينك واخلال بالمساواة وتكافؤ الفرص والعدالة الاجتماعية ..

باختصار هو عارف انه ميقدرش يهوب ناحية المدارس الدولية لأسباب كتير ومعندوش حيطة واطية الا مدارس الحكومة والتجريبي يعملهم حقل تجارب .

ضيف على كده ان الوزير سايب فراغات مفتوحة مليانة علامات استفهام ، ولا حاول يبذل جهد بجد علشان يملاها بكلام حقيقي ، لما تسأله عن الدروس الخصوصية يقول لك هندّي الطالب الحاجة على فلاشة ( حاجة شبه صباع الكفتة كده ) ..

وهو في الاصل حط مستقبل الطالب في ايد المدرس اللي هيحكم ويتحكم بدرجات أعمال السنة طول 3 سنين ...ياسلام على العز ..

علشان كده تقريبا المدرسين بيتفرجوا من بعيد وهم ساكتين ...بيجهزوا السكاكين بس..

طيب هتعمل ايه في الكوادر اللي عندك ودربتهم على نظامك ابوتابلت ولا ايه ؟

يرد بكلام كتير متقدرش تمسك منه اجابة واضحة ..بس كلام كبير عن تحصيل تكنولوجي ومصادر تعليم متعددة ..وحل الامتحان في الكافيه !!

ولما تقول له ان الموضوع ليه علاقة بالبنك الدولي والقرض الجديد وان ...يقاطعك وهو بيوجه لك اتهامات اقلها انك مش فاهم ومعندكش معلومات كفاية علشان تبقى مؤهل تتكلم أصلاً ، وان قرض البنك الدولي ده مالوش علاقة خاااالص بموضوع التطوير للثانوية العامة ، ومايوضحش ولايفسر حاجة بعد كده ( ممكن نراجع تصريحات الوزير والمتحدث باسم الوزارة الكام اسبوع اللي فاتوا علشان نتأكد ..كلها بتقول ان النظام الجديد حلو وزي العسل وانه اتوافق عليه من اولياء الأمور( ازاي؟؟) ومن مجلس الشعب والرئيس مبسوط بيه شخصيا..

حضرتك المدارس مكدسة ومافيهاش مراوح ولا دورات مياة ولا مدرسين بجد ولا وسائل تعليمية من البدائية القديمة دي ، وعايز تجرها معاك للمستقبل المشرق مع التابلت ..

حضرتك كان فيه مادة مهمة اسمها الكمبيوتر وبدل ماتنزل لها مناهج محددة وكتب خليتها مادة غير اساسية واتركنت على جنب ..

طيب هل ممكن نحلم بشوية شفافية ونطلب من معالي الوزير اعلان اسامي الخبراء الجامدين العباقرة اللي اشتركوا مع الوزير ورجالته في صياغة النظام الجديد ؟ مؤهلاتهم وخبراتهم السابقة وكده ؟

بلاش ..كلنا عارفين التقدم الرهيب اللي حصل في الغش الفردي والجماعي والامتحانات اللي كانت بتتسرق برعاية رسمية احياناً وبقوة المال وأشياء أخرى ..

ازاي إمتحان يكون علي مستوي المدرسة وتقييم المدرسة في الحالة دي؟ وايه الضمانات علشان متحصلش حالات غش جماعي او تواطؤ من المدرسين اللي ممكن يغششوا الطلبة او يكتبوا لهم على التابلت ؟...وفيه تجارب سابقة كتيييييييييير تأكد ان ده ممكن يحصل بسهولة ويسر ..طالما فيه فلوس او سلطة رسمية او عائلية الخ الخ

يادكتور طارق ..ينفع طلب أخير زي اللي رايح ينفذ حكم اعدام..جرب تقعد مع مئات التربويين المتخصصين والخبراء واساتذة تربية وتفتح قلبك وودانك كده وتسمع كلامهم بتركيز ...صدقني والله دول فيهم الخير عن موظفين الديوان عندك وقلبهم على مصلحة ولادنا يمكن أكتر من معاليك ..

وياريت تبقى القعدة دي مذاعة على الهوا علشان الناس تتابع وتفهم

يمكن توفر على نفسك دعا اولياء أمور وطلبة هيستمر أجيال

أخيراً ..حد من موظفين معاليك قال لك ان فيه طالبة اسمها اية حمدي محمد من قنا ماتت بسبب الحر وهي بتمتحن الدبلوم ...مكنش سعادتك فيه مراوح ولا اسعافات ولا اي امكانيات طبية ..

تعرف ان رئيس لجنة الامتحانات لما سألوه عن التقصير وكده قال ايه ؟

قال انا بنام على تختتين وعليهم حديدة في النص

-----------------------------

نجوم رمضان السنة دي ..ربنا يسعد قلوبكم

مسلسلات رمضان السنة دي مليانة مشاكل وعيوب ممكن تقفلك منها وتدور على حاجة تاني تتابعها ، لكن من حسناتها ان بيبقى عندنا فرص نستمتع بأداء ممثلين كبار تألقوا في أدوراهم وقدموا متعة حقيقية للمشاهد ، ممثلين بنعتبرهم نعمة من نعم ربنا لأن ظهورهم وأداءهم بيسعد ملايين ..ربنا يسعدهم جميعا..

فتحي عبد الوهاب :

من أول ظهور له في فيلم سارق الفرح وهو مختلف ، شكل ولون وأداء..

السنة دي من نعم ربنا علينا اننا بنشوف فتحي 3 مرات في ابو عمر المصري وعوالم خفية وممنوع الاقتراب والتصوير ، ده غير ظهوره كضيف شرف في مسلسل ربع رومي ، ومسلسل رحيم.

فتحي فنان من الوزن التقيل ، الدور بياخد حتة منه ،بيمثل تراجيدي ولا كوميدي مش هتقدر تنساه ، مش محتاج بطولة مطلقة ولا احنا عايزينه يدخل سبق تجاري ليه معايير كتير مش منها عبقرية الاداء ، من كتر تركيزه في الشخصية اللي بيعملها بيتحول لبني ادم تاني بيطلع منه بصعوبة..

مرة حكى لي ان فنان كبير نصحه وهو بيعمل فيلم من افلامه انه يخف تركيز شوية ، ويمثل عادي زي كل الناس علشان مايقعدش في بيتهم كتير ، كان منطقه ان النجوم الكبار عموماً مش بيحبوا اللي يطفيهم قدام الكاميرا ويسرق منهم تركيز المشاهد ، وفتحي بيعمل كده بالظبط بمجرد ظهوره.

خلينا نكمل فرجة واستمتاع بسمير العبد رجل الاعمال الفاسد في ابو عمر المصري ، ونتابع قد ايه الراجل ده شارب الشخصية وهاضم تفاصيلها ومكمل عليها من روحه ..

او نتابع قد ايه ظابط الشرطة مختلف مع فتحي وله شكل تاني في عوالم خفية وممنوع الاقترابآآآ 

صبري فواز

مولانا غول التمثيل والمشخصاتي اللي بجد وزي مابيقول الكتاب ، ولو كتبت الاف الصفحات عنه مش كفاية ، هو باختصار بيمثل وهو سايب ايديه ، مش بيضغط على نفسه ومتهيألي حتى مش مضطر يحفظ الدور ويعمل بروفات ، صبري يختار الشخصية ويقيفها على مقاس عبقريته ويقف قدام الكاميرا وكأنه بحق وحقيق ..

معتقدش ان السبب في كده انه شاعر كبير ومثقف حقيقي بس أو انه مخرج كبير له في المسرح علامات ..

صبري راهب في معبد الفن من صغره ، مش عايز حاجة الا انه يمثل ويمثل وبس ، لو سابوه يختار براحته بعيد عن حسابات المنتجين وتوازناتهم كان زمانه خدنا معاه لمساحات أبعد واعلى بكتييييييير جداً..

سهل نفتكر عمل المعلم عرابي المتدين النصاب ازاي في كلمني شكراً ، ولا

مولانا اصبح من اهم علامات رمضان ، بنلاحقه ونتفرج عليه في اي عمل، كوميدي او تراجيدي، بيعمل شرير ولا طيب ، في كل مرة بيدينا من نبعه اللي مش بيخلص المزيز والمزيد من البركات والفن الحقيقيآآآ 

محمد ممدوح

كتلة مشاعر تتحرك على قدمين ، محمد ممدوح ( تايسون) اللي للأسف مش بنشوفه الا في مسلسل اختفاء من أهم مكونات مائدة الدراما عموماً ، صعب نتقبل موسم من غيره ، بعد اللي عمله فينا في ملسلسل لاتطفئ الشمس.

ممدوح السنة دي مختلف ..في دور سليمان عبد الدايم ، هو اهم سبب يخليك تتحمل ركاكة الورق بتاع المسلسل علشان تتابعه وتنبسط .

لأنه ببساطة من أكتر الناس اللي تقدر تطلع الضحكة من قلبك وتقدر في دور تاني تبكيك بجد..( مين ينسى مشاهده في لاتطفئ الشمس؟)

كام دور ممكن نقول ان محمد ممدوح ساب اثر بيهم جوانا ؟ ظابط المباحث الفاسد في ولاد رزق ولا الدكتور في الفيل الازرق اللي قدر يخطف الكاميرا واهتمام المشاهدين في كل ظهور له ..؟

أحمد في لاتطفئ الشمس اللي كان بيمثل وهو ساكت ولا أمين بطل جراند اوتيل بلا منازع

محمد طعيمة

أكثر الشخصيات اللي سابت أثر عند المشاهدين من اول ظهوره في اعلان اتصالات ثم برنامج البلاتوه اللي تألق فيه وكان من عوامل نجاحه ، وظهوره اللاافت في مسلسل خلصانة بشياكة ( ابن فخدون) السنة اللي فاتت ..

وأخيراً محمد الموظف المحظوظ في الوصية السنة دي ..قمة المتعة والضحك اللي بجد

محمد جمعة

السنة اللي فاتت الناس كلها اتفاجئت بنجم كبير في مسلسل هذا المساء هو محمد جمعة، اللي ظهر وكأنه ممثل عالمي له في السينما والدراما علامات ، ومن نعم ربنا علينا انه موجود السنة دي في 3 اعمال اهمهم من وجهة نظري الوصية لأنه بيمثل كوميدي وهو في منتهى النكد والحزن ، دور جديد وأداء مختلف ، ممكن كمان نشوف عامل دور المحامي الانتهازي ازاي في ضد مجهول ، والمغترب محمد البحيري في ابو جمعة المصري.آآآ 

خالد كمال

خالد كمال نجم بطعم ولون مختلف ، ظهوره مهم واداؤه راقي سواء كان في دور كوميدي او جاد ، حضور طاغي في دوره بمسلسل الوصية والكراكتر اللي قدمه جديد ومختلف خاصة مع مساعده اللي هيبقى له مستقبل كبير في الكوميديا..او اسماعيلآآ آ الشرير في مسلسل ليالي اوجيني.

خالد ممثل كبير قدم تقريبا 94 مسرحية ويمكن ده السبب اللي بيخلي ادواره تركز في الراس وماتتنسيش، خاصة في السبع وصايا ولا تطفئ الشمس وواحة الغروب.

----------------------

وليه آ لما بقف في كَمين أنا بس اللي بتفتش؟!

السنة دي مفيش تامر محسن ..ومسلسل روبي متأجل ..والدراما بعافية شوية ماعدا الوصية مصدر البهجة والضحك في رمضان السنة دي

الوصية نمرة واحد ..بتفوق..أكرم حسني مع أحمد أمين

انت متخيل يا مان ..؟طيب شفت مشهد الظابط ...؟ولا مشهد الفندق ..ولا مشاهد هشام عباس ومحمود الليثي ؟ طب شفت مشهد العربية ..بتاع الحمل بعد الاربعين ؟

ولا لما امين انفجر في اكرم في الشركة ..؟

وعارف اغنية التتر عاملة ايه مع الاطفال وبيحبوها قد ايه؟

دي "المسخرة" كما يجب أن تكون ..تشكيلة نجوم يشكر اللي عرف يكونها بالتكمل ده

أكرم وأمين وبيومي فؤاد وريم مصطفى واحمد حلاوة وخالد كمال ومحمد جمعة ومحمد طعيمة ..وباقي الابطال ..ايه خفة الدم دي

وضيوف الشرف وكلهم من الوزن التقيل

والورق ..الله ع الورق

أيمن وتّار مصيبة كوميديا طبعا ( رغم انها هربت منه في هربانة منها السنة اللي فاتت )

ومعاه مصطفى حلمي اللي مايقلش عنه ..

له في الكوميديا علامات أهمها الكبير أوي ..واس ان ال بالعربي

خالد الحلفاوي المخرج ( ابن نبيل الحلفاوي وفردوس عبد الحميد ) ازعم ان ده التطور الطبيعي بالنسبة له بعد تجاربه اللي فاتت( خالد اشتغل مساعد مخرج من ايام زيزينيا )

م الاخر ..نص ساعة من المتعة الخالصة ..اغاني وكوميديا وضحكة بتطلع م القلب

وبنتفرج واحنا متأكدين ان المسلسل مخبي حاجات كتيييير أحلى

الاغنية بتاعة الحلقة الاولى(بسبوسة) جميييييلة ..والصوت الجميل لعماد كمال

وايه أغنية هشام عباس دي وازاي وبأي مزاج اتعملت ..كلام ولحن وأداء

ولا كلام أكرم حسني وأمير طعيمة وروعته أمير طعيمة وروعته..الناس دي ازاي كده ؟

و...

انا المجروح ومهما تهدي فيا يا دنيا متهدش

ولما وزعوا الفرحة خدوها الناس وانا مخدتش

سؤال واجابته ايه يا دنيا

ليه حاطة على جرحي كلونيا

وليه لما بقف في كمين انا بس اللي بتفتش

انا الممزوق في سمانتي ضايعلي فردة في جوانتي

وحظي بقيسه بالسنتي مبيكملش كام مللي

بلاقي العضم في الكرشة

حياتي لا حلوة ولا حرشة

واحط في جزمتي فرشة وبرضه تلق لما امشي

----------------
بقلم: خالد الدخيل